Ohridski đomleze: Starinski recept od samo četiri sastojka koji je postao biser makedonske kuhinje

Đomleze je jelo koje se priprema od rijetkog tijesta i poput mnogih današnjih specijaliteta stiže iz kuhinje nekadašnje sirotinje, ovoga puta iz Sjeverne Makedonije. Negdje ga zovu i turipotpeci, zato što se i bukvalno stavi u rernu i potpeče svaki sloj tijesta.

Đomleze se sprema od lijevanog, pa pečenog tijesta, i tipičan je za Ohrid, Strugu i Prespu. Ako odete na ovo predivno jezero, sigurno ćete biti ponuđeni starinskim jelom koje bi se najbliže moglo označiti kao pita, a ipak to nije. Nije ni lisnata, iako se sastoji od mnogo slojeva.

Majstori za pripemu ovog specijaliteta bili su u pravu kada su đomleze odlučili da ponude gostima kao jedan od aduta ruralne kuhinje ovog kraja. Može se probati i na lokalnoj pijaci, gdje se na komad prodaje iz velikih okruglih plehova, a komadi su najčešće izrezani na rombove.

Po izvornoj recepturi đomleze se peče na ognjištu, pod žarom, ali se ukus neće pretjerano promijeniti ni ako odlučite da jelo spremite u dobro zagrijanoj rerni. Zato predstavljamo recept koji možete da isprobate, a nije mnogo komplikovan za pripremu. Okej, treba malo strpljenja, ali isplati se.

Potrebno je:

1,5 kg brašna, 2 l vode, 100 ml ulja, 2 kašičice soli

Priprema:

Dobro sjedinite sve sastojke tako da se dobije malo gušća smjesa nego ona koju pripremate za palačinke.

Podmažite uljem veću okruglu tepsiju i stavite je na gornju rešetku dobro zagrijane rerne, ispod samog grijača. Kada se ulje zagrije izvadite tepsiju i kutljačom izlijte tanak sloj tijesta, pa vratite u rernu.

Kad tijesto dobije lijepu boju izvadite tepsiju, premažite prvi sloj sa malo ulja i izlijte još jednu koru, vratite u rernu da se potpeče i tako radite naizmjenično dok ne potrošite svo tijesto.

Na kraju izrežite kao baklavu, na manje ili veće rombove i poslužite sa jogurtom ili kuselim mlijekom.

Naravno, noviji recepti su donijeli obogaćenu varijantu izvorne varijante, pa se tijestu dodaje i jogurt, a ima i onih koji su đomleze pretvorili u pite dodajući između slojeva sir ili meso, piše Žena.