Probajte neodoljivu poslasticu Zuppa Inglese: Evo i kako je napraviti

Donosimo vam jednostavan recept za kremastu, laganu i veoma ukusnu poslasticu Zuppa Inglese. Ovaj desert se dobija kombinacijom krema od jaja sa piškotama koje su namočene italijanskim crvenim likerom (Alchermes).

Liker je bogat aromom klinčića, muskatnog oraščića, kardamoma, cimeta, vanile, anisa. A grimiznu boju duguje esenciji kermesa jedne vrste sićušnog insekta koja se koristila vjekovima unazad za bojenje kako hrane tako i tkanina.

Danas se koriste zamjene za bojenje, ali je crveni liker ostao popularan u Toskani kao i na Siciliji. Da se vratimo na desert, vrlo je jednostavan, lak, kremast, a veoma ukusan.

Potrebni sastojci:

6 žumanaca

250g šećera

400ml mlijeka

50g gustina

1 štapić vanile

100ml pavlake za šlag

100g čokolade za kuvanje

1 pakovanje piškota

100ml likera alkermes

200ml vode

Način pripreme:

Krem:

U posudu staviti mlijeko, pavlaku za šlag i mahunu vanile, pomiješati. Zagrijati do ključanja. Nakon toga izvaditi mahunu.

Žumanca umutiti sa polovinom šećera, dodati gustin, sjemenke iz mahune vanile.

Smjesu lagano spustiti u vrelo mlijeko, neprestano miješajući na laganoj vatri, sve dok krem ne postane gust.

Nakon toga dobijeni krem podijeliti na dva dijela, žuti i tamni u koji treba dodati čokoladu. Ohladiti.

Kuvanjem ostatka šećera i vode napraviti rijedak sirup. Kada se sirup prohladi dodati liker alkermes kako bi dobili crvenu boju sirupa za prelivanje piškota.

Poslužiti na sljedeći način: Uzeti manje staklene posudice, prvo staviti piškote na dno pa kašičicom sipati sirup crvene boje, na to žuti krem, red piškota, pa red tamnog krema i tako do vrha.

Napomena: Ukoliko nemate navedeni liker drugi izbor je amareto, a treći rum. U tom slučaju nećete imati crvenu boju u kolaču.