Ukrajina ne planira poslati oružane snage na Krim

Ukrajinski vršilac dužnosti ministra odbrane Ihor Tenjuk rekao je da Ukrajina ne planira poslati oružane snage na Krim.

Odgovarajući na nagađanja u medijima o ukrajinskim vojnim planovima nakon što su ruske snage preuzele kontrolu nad Krimom, Tenjuk je rekao da je jedino kretanje trupa koje se može uočiti ono u kampovima za obuku.

"Ne predviđamo kretanje niti odlazak oružanih snaga za Krim. Oni rade svoj rutinski posao koje su oružane snage uvijek radile", rekao je Tenjuk za novinare, prenosi Reuters, javlja Fena. 

Ruske snage su preuzele kontrolu nad Krimom bez prolijevanja krvi. Došlo je do nekoliko manjih sporova s ukrajinskim snagama na vojnim kontrolnim punktovima, ali Ukrajinci nisu pružali oružani otpor.

Ukrajinsko ministarstvo odbrane je u nedjelju objavilo spisak lokacija mjesta gdje ruske oružane snage blokiraju ukrajinske snage.